Batalha deis Ardenas
La batalha deis Ardenas se debanèt dins lo corrent de la Segonda Guèrra Mondiala dau 16 de decembre de 1944 au 25 de genier de 1945. Foguèt la consequéncia d'una ofensiva alemanda còntra lei posicions estatsunidencas desgarnidas deis Ardenas. Aprofichant de condicions climaticas malaisadas qu'empachavan l'utilizacion de son aviacion per leis Aliats, leis Alemands rompèron lo frònt aliat e menacèron lo pòrt d'Anvèrs. Pasmens, a partir de la fin de decembre, de renfòrç e de bombardaments aerians aliats importants bloquèron son avançada. Puei, a la fin de genier, l'armada alemanda deguèt retirar sei fòrças principalas per faciar una ofensiva d'amplor de l'armada sovietica sus lo frònt de l'Èst (ofensiva de Prússia Orientala). A la fin dau mes, leis Aliats avián reconquistat totei lei territòris perduts.
Lo bilanç uman de la batalha foguèt de 91 000 soudats perduts e 800 carris destruchs per leis Aliats. De son caire, l'armada alemanda perdiguèt entre 67 000 e 100 000 combatents e 600 carris. Dins aquò, lo remplaçament dei pèrdas èra vengut fòrça problematic per la Wehrmacht e lei blindats perduts dins leis Ardenas manquèron en abriu de 1945 per defendre Berlin còntra lei Sovietics.