Batalha de Narva (1944)

La batalha de Narva se debanèt dins lo corrent de la Segonda Guèrra Mondiala dau 2 de febrier au 10 d'aost de 1944. Foguèt la consequéncia d'una ofensiva sovietica destinada a reconquistar leis país baltics e opausèt l'Armada Roja ai fòrças alemandas renfòrçadas per de volontaris estonians.

Son debanament pòu se devesir entre dos periòdes principaus que son la batalha de la tèsta de pònt de Narva (febrier-julhet de 1944) e la batalha de la Linha Tannenberg (julhet-aost de 1944). Lei Sovietics capitèron d'establir una tiera de tèsta de pònt lòng de Narva mai mau capitèron de perseguir son avançada. Au contrari, una tiera de còntra-ofensivas alemandas entraïnèt la destruccion de la màger part dei tèstas de pònt. Aqueu succès defensiu permetèt ais Alemands de mantenir son contraròtle sus lei país baltics e de gardar Finlandia dins la guèrra en empachant l'armada sovietica de l'atacar per darrier a partir dau territòri estonian.

Lo bilanç uman de la batalha foguèt de 68 000 combatents perduts per l'Axe (14 000 tuats e 54 000 bleçats) còntra 480 000 per lei Sovietics (100 000 tuats e 380 000 bleçats).