Batalha de Mansfield
La batalha de Mansfield se debanèt lo 8 d'abriu de 1864 durant la [[Guèrra de Secession (1861-1865). Opausèt una armada nordista de 12 000 òmes comandats per lo generau Nathaniel Banks ai tropas dau generau sudista Richard Taylor (9 000 òmes). S'acabèt per una victòria defensiva de la Confederacion que capitèt d'arrestar definitivament leis ofensivas estatsunidencas vèrs Tèxas.
Lo debanament de la batalha foguèt marcat per una multiplicacion d'errors de part dau comandament unionista. Aguent atacat sensa esperar l'arribada de totei lei renfòrç disponibles, lo generau Banks foguèt durament batut. Perdiguèt mai de 2 000 òmes còntra un milier per son adversari. De mai, l'endemans, deguèt tornar liurar un combat malaisat a la batalha de Pleasant Hill que menèt a sa retirada definitiva après la captura ò la destruccion de la màger part de son avitalhament.
Se lo combat empediguèt lo Nòrd d'ocupar Tèxas, aguèt ges d'efiech sus l'eissida de la guèrra car lo frònt texan èra un teatre segondari. Ansin, lei fòrças sudistas de la region capitulèron après la desfacha dei principaleis armadas de la Confederacion en abriu de 1865.