Amagatada
Jogar o far a l'amagatada, a l'amagat (o: d'amagat, d'amagadons), de rescondon(s), a rescondilh(on)s, de rescondut, al cluquet, a cata òrba o cutabòrlhe (prov. ais escondalhas o escondudas; gasc. a l'amagat, a l’estujat, a l'oreta, au cluquet/cloquet, ath cluc, aus estujòus, aths esconilhons, a las esconetèras/aras esconedèras, a escon-te lèbe(s) ; lem. a cachamita f., a cachareu, a escondudas; viv. as escondalhas, a cacha-cachòus) es un jòc ont mantas personas s'amagan o s'escondon d'una autra, qui deu descobrir l'amagatalh de totas las personas amagadas per ganhar la partida.
Objectiu del jòc modificar
Los jogaires se devon amagar per non èsser pas trobats per l'un d'eles, designat a l'avança.
Debanament modificar
Lo quadre del jòc pòt èsser un espaci en plen aire o un grand ostal. Es fòrtament recomandat de delimitar a l'avança lo territòri autorizat pel jòc.
Un jogaire, designat coma lo cutaire o cercaire, se vira contra un arbre o una paret e compta, uèlh cutats, fins a un cèrt nombre del temps (50 per exemple) del temps que los autres s'amagan. A la fin de son comptatge, partís en quista dels autres jogaires. Quand ne tròba un, crida « trobat » o « vist(a) » e lo nom del jogaire trobat. Pòdon alara cercar amassa los jogaires sobrants, fins que totes sián descobèrts. Lo cutaire deu dessobtar los autres jogaires sens tròp s'alunhar de l'arbre o de la paret, que se per cas un mainatge amagat ven tocar l'arbre o la paret abans el, aquel mainatge a ganhat.
Durant la part seguenta, lo cercaire pòt èsser lo primièr a èsser estat trobat o al contrari lo darrièr.
Varianta modificar
Existís una varianta de l'amagatada tradicionala sonada « jòc de la sardina » o « amagatada sardina » dins la quala un sol jogaire s'amaga ; los autres jogaires qu'arriban a trobar la « sardina » la devon rejónher dins son amagatalh sens se far avistar pels autres jogaires. Lo darrièr jogaire a trobar l'amagatalh ven alara la sardina per la partida seguenta.
Una autra varianta es a vista : lo jogaire qu'es vist per lo que clunha pren la plaça d'aqueste.