Al-Muqtadir (Abbassida)

Moneda dau rèine d'Al-Muqtadir.

Al-Muqtadir (13 de novembre de 895, Bagdad - 31 d'octòbre de 932) foguèt lo califa dau Califat Abbassida dau 14 d'aost de 908 au 31 d'octòbre de 932. Succediguèt a son fraire Al-Muktafi (902-908) e foguèt remplaçat per Al-Qahir (932-934).

Son rèine marquèt una etapa decisiva dins l'afebliment dei califas abbassidas. D'efiech, foguèt marcat per una instabilitat importanta au sen dau govèrn amb una succession rapida de visirs qu'empediguèt l'adopcion d'una politica establa e coerenta. De mai, la gestion dei finanças, ja problematica sota sei predecessors, s'agravèt privant lo poder de ressorsas en despiech d'impòsts relativament importants. Enfin, lo califa èra dins la dependent de sei mercenaris turcs per assegurar sa seguretat. Ansin, l'emir Munis al-Muzaffar foguèt probablament lo cap vertadier dau Califat durant tot lo rèine d'Al-Muqtadir.

Dins aqueu contèxte, lo periòde d'Al-Muqtadir veguèt la perseguida dau declin de la poissança abbassida. En Anatolia, foguèt obligat d'acceptar divèrsei conquistas bizantinas e de prepausar un important recapte en cambi de la liberacion de presoniers musulmans. Dins lo rèsta de l'Empèri, la preséncia abbassida èra menaçada en Egipte e lei Hamdanides de Mossol venguèron de facto independents. Aquò entraïnèt de trèbols intèrnes grèus e una premiera temptativa de còp d'Estat aguèt luòc en 929 au profiech d'Al-Qahir, fraire cadet d'Al-Muqtadir. Lo projècte mau capitèt mai lei combats laissèron una armada devesida e afeblida. Dins de circonstàncias mau conegudas, entraïnèron tanben una guèrra civila entre lei fòrças de l'emir Munis e dau califa que foguèt tuat sus lo prat batalhier en 932. Lo venceire placèt alora Al-Qahir sus lo tròne.

Liames intèrnesModificar

BibliografiaModificar

Nòtas e referénciasModificar