Lo panda roge o pichòt panda es un mamifèr que viu dins Imalaia e al nòrd de Birmania. Son nom ven d’una lenga d’Imalaia, benlèu del nepalés.

Lo pichòt panda fa la talha d’un grand cat (60 cm) amb una longa coa. A lo còs ros , las patas e lo cap negres e blancs, de bendas jaunas sus la coa. Se pòt téner drech. Sas arpas li permeton de montar als arbres e de ne davalar lo cap en bas.

Los pandas gigants partisson fòrças territòris amb los pichons. Los pichons pandas manjan de bambós, de frucha, de racinas, d’aglands, de liquèns, d’uòus, d’aucelons, e de carn quand son en captivitat, mas un regim compausat de tròp de carn pòt provocar la mòrt.

Lo pichòt panda es principalament nuechenc. Viu dins los arbres per se noirir e escapar a son principal predator : la pantèra de las nèus.

Es un animal solitari. La reproduccion a luòc entre la mitat del mes de mai e la mitat del mes de julh. La femèla pòt aver dos pichòts al maximum. La gestacion dura en mejana 135 jorns, los pichons atenhon lor maduretat sexuala entre 18 e 20 meses.

L’espècia es actualament en dangièr per encausa del braconatge e de la reduccion de son espaci de vida.