Étienne-Barthélémy Garnier
Étienne-Barthélémy Garnier (París, 24 d'agost de 1759 - París, 16 de novembre de 1849) foguèt un pintor francés. Discípol del pintor occitan Josèp Maria Vien, foguèt recebut segond al concors artistic Prèmi de Roma en 1787 mas per contra amb son òbra La Mòrt de Taci se ganhèt lo primièr prèmi l'annada seguenta.
Especializat dins la produccion de scènas istoricas, son òbra mai prestigiosa es La consternacion de Priam e de sa familha (en francés: La consternation de Priam et de sa famille) servada actualament al Musèu d'Engoleime.
En 1816 foguèt causit coma membre de l'Acadèmia de Bèlas Arts francesa.
Biografia
modificarÉtienne-Barthélémy Garnier nasquèt en 1759 dins una familha de notables parisencs. Enfant unic, foguèt mandat al Collège Mazarin ont faguèt d'estudis serioses. Se dirigiguèt pro lèu cap a una carrièra artistica, e comencèt a aprendre lo dessenh amb lo pintor Louis Durameau. Passèt puèi pel talhièr d'un autre pintor parisenc, Gabriel-François Doyen abans de venir discípol del montpelhierenc Josèp Maria Vien.
Jos la direccion de son mèstre, participèt en 1787 al Prèmi de Roma amb son òbra La mòrt de Sedecias e emportèt alara lo segond prèmi. Un an mai tard, en 1788 se tornèt presentar e ganhèt lo primièr prèmi gràcias a La mòrt de Taci. Posteriorament Garnier partiguèt viure e estudiar dins la capitala italiana. Realizèt alara d'autras escenas istoricas abans de tornar a París en 1793 per evitar los trebolaments que se vivián en aquel temps a Roma. En 1800 presentèt son òbra màger La desolacion de la familha de Priam al salon d'aquel an e aquesta foguèt alara considerada coma una de las òbras mai importantas de son temps.
En 1816 quand se reorganizèt l'Acadèmia de las Bèlas Arts francesa, se demandèt a Garnier de ne venir membre. Foguèt nomenat puèi en 1819 cavalièr de la legion d'onor.