Nemicolopterus

Nemicolopterus crypticus ei un genre de pterosaure pterodactyloidea arboricola plan petit. S'a trapat ua esqueleta fossil gaireben completa en Joheol, ena China, en eth lòc de Jiufotang. Er olotipe ei eth solet individú enquia aué e a 120 milions d'ans. Demorèc pendent eth Cretacèu inferior, pendent er Aptian.

Nemicolopterus qu'ei benlèu eth pterosaure mès petit jamès descurbert enquia aué. Demorava pas coma d'autes pterosaures ena costa mès en es bòsqui

Fossils

Eth fossil siguec descurbert en es sediments on i auia argila, en Jiufotang, ena provincia de Jehol, ena China. Qu'ei plan ben conservat. Es paleontològs tamben an descurbert aquerò que pensen qu'ei er contengut der estomac deth pterosaure o teishit mòfle en eth fossil.

Anatomia

Nemicolopterus ei un pterosaure dera familha des Dsungariptoidea plan petit. Poderiá éster qu'er animal estosse un animal joen mès pas un qu'acabava d'éster vadut. A 7 cm de longada e 25 cm d'envergadura. Non auia pas dents. S'a descrit coma un pterosaure qu'auia un proces nasal miei, ua cresta deltapectoral de l'umer coma un coltèth e un proces posterior deth femur sus era articulacion damb era tibia plan desvolopat.

Eth cran héia 4,03 cm e era orbita 9,1 mm. Era henestra nasoantorbital ei plan petita mès pas tant coma en d'autes Pterodontidae coma Pteranodon o en es Ctanochasmatidae coma Ctenochasma e Pterodaustro.

Aquest pterodactil auia pas cresta sus eth cran. Es vertebres cervicals son cuertes e i a pas de costes cervicals, hèt tipic des Pterodactyloidea. Es 8 vertebres sacres son pas amassa en un synsacrum. Aguest pterosaure auia ua coa plan cuerta de sonque cuate vertebres. Eth fossil auia gastralias.

Filogenia e evolucion

Aguest pterosaure a pas es caracteristiques tipiques des Pterodactyloidea coma un cran rond per darrèr e a pas de cresta. Açò a hèt díder as scientifics qu'aguesta espècie ei ua des mès basals demest es Dsungaripteroidea. Que seriá eth grop frair des Ornithicheiroidea. Aguesti aurien auut per origina es animals anatomicaments semblants a Nemicolopterus, shens dents e shens cresta.

Ecologia

I auia plan de pterosaures que demoraven en eth litoral e qu'an sigut trapats en sediments dera costa. Mès Nemicolopterus siguec trapat en formasons continentalas.

Aguest pterosaure demorava donques, proche der ocean mès en grani bòsqui de gimnospermes. Eth grad de corvatura dera darrèra falange deth pè, que sembla qu'ei unenc en aguesta espècie e sembla arremercar ua vida sus es arbes.Aguesta madeisha corvatura s'a trapat pendent es persosi moderns pr'amor que l'utilisen tà se penjar des branques. Auia pas un det oposable, coma es audèths.

Quauques pterosaures coma Anurognathidae Jeholopterus sembla que tamben demoraven sus es arbes. Qu'ei donques possible qu'aguest animal haja minjat insectes e volesse sus es bòsqui de gimnospermes que caperauen era China pendent es inicis deth Cretacèu.

Hònts

• X. Wang, A. W. A. Kellner, Z. Zhou and D. A. Campos. 2008. Discovery of a rare arboreal forest dwelling flying reptile (Pterosauria, Pterodactyloidea) from China. Proceedings of the National Academy of Sciences 105(6):1983-1987
• Paleobiology Database: https://web.archive.org/web/20100228083838/http://pbdb.org/cgi-bin/bridge.pl
• Corinne Fortin, Guillaume Lecointre, Marie-Laure Le Louarn Bonnet, Gérard Guillot, Guide critique de l'évolution, éd. Belin, 2009, (ISBN 978-2-7011-4797-0).