Mano Negra èra un grop de rock francés format còsta París (Sèvres) a l'entorn del cantaire de soca basca e galhega Manu Chao. Actiu entre 1987 e 1994, a sortit quatre albums estudiòs. Plan popular tre lors debuts, es considerat coma un dels grops màgers de la scèna rock de França a la fin de las annadas 80 e al debut de las annadas 90. L'originalitat del grop en comparason ambe los autres de sa generacion (Indochine, Bérurier Noir, Les Infidèles, Elmer Food Beat...) es de pas emplegar sonque lo francés per cantar : aital, lor primièr succès, Mala Vida, èra cantat en espanhòl, King Kong 5 cantat en anglés, lo quite Sidi h'bibi una represa rock d'una cançon tradicionala araba[1].

La Mano Negra en 1990

Biografia modificar

Dins las annadas 80, Manu Chao jòga de guitarra o canta dins mantuns pichons grops diferents de la scèna parisenca coma Joint de culasse, Les Flappers, Hot Pants, Parachute, Kingsnakes e Los Carayos. A lo projècte de far un grop mai personal, e aital acampa musicians crotzats dins aquestas divèrsas formacions, de'n primièr son fraire Antoine o encara son cosin Santi (Santiago Casariego). Aital La Mano Negra es una formacion gaireben familiala. Musicalament directament eissida de Hot Pants e Los Carayos, enregistra logicament lo primièr disc, lo mitic Patchanka, ençò de l'ostal de disc de la scèna rock independenta Boucherie Productions qu'èra la dels Carayos e de Hot Pants. Lo succès es fulgurant gràcias al tube sospresa Mala vida e son còp-sèc contactats per un gròs ostal de disc internacional, Virgin Records, per i tornar editar Patchanka e poder capitalizar son potencial comercial.

En tot, Mano Negra sortiguèt quatre albums ambe Virgin entre 1989 e 1994. D'aqueste biais, Mano Negra es estat sovent opausat a Bérurier Noir, grop tanben eissit de la scèna rock independenta parisenca de las annadas 80 dita alternativa, mès que se son desseparats en 1989 quand i aguèt contradiccion entre lor popularitat e lor independéncia artistica. Mentre, Mano Negra faguèron la causida de renonciar a l'alternativa rock per se virar cap a una carrièra costumièra de rock stars del show business, ambe d'albums plan distribuïts de pertot dins los centres comercials e fòrça sostenguts per de campanhas de publicitat per son ostal de disc, passatges promocionals del grop a la television pendent las oras de granda escota etc.

Aital, en 1990, an recebut lo Bus d'Acier, lo Grand prèmi del rock francés.

Aprèp lor quatren album Casa Babylon sortit en 1994, Manu Chao començèt de s'alassar del grop e pichon a pichon se virèt cap a una carrièra solò coronada de succès.

Discografia modificar

  • 1988: Patchanka
  • 1989: Puta's fever
  • 1991: King of Bongo
  • 1994: Casa Babylon

Cançons mai conegudas modificar

  • Mala vida (1988)
  • Indios de Barcelona (1988)
  • Ronde de Nuit (1988)[2]
  • King Kong 5 (1989)
  • Mad House (1989)
  • Peligro (1989)
  • La rançon du succès (1989)
  • Pas assez de toi (1990)
  • Patchanka (1990)
  • Sidi h'bibi (1991)
  • King of Bongo (1991)
  • Madame Oscar (1991)
  • Out of time man (1991)
  • Don't Want You No More (1992)
  • Mad Man's Dead (1993)
  • Santa Maradona - Larchuma Football Club (1994)
  • Señor Matanza (1994)
  • Hamburger Fields (1994)

Referéncias modificar

  1. https://journals.openedition.org/volume/5399?lang=en
  2. https://www.humanite.fr/culture-et-savoirs/connait-la-chanson-pas-les-paroles/mano-negra-ronde-de-nuit-un-hymne-la-preservation-du-paris-noctambule-691815