Hervé Lebreton (Blois, França, 6 de julh de 1971) es un ensenhaire e activista francés. Aqueste professor de matematicas se faguèt conéisser tre 2011 qu'amb son associacion "Pour une démocratie directe", fondada tres ans abans, capitèt d'obtenir los detalhs d'utilizacion de la resèrva parlamentària dels deputats e senadors franceses, abans ocultada.

Biografia modificar

Hervé Lebreton nasquèt a Blois en 1971 dins una familha d'ensenhaires. Son paire es universitari e cercaire en espectroscopia . D'origina bretona e còrsa, cresquèt en Torena. Maridat a una regenta, e paire de doas filhas, aqueste ensenhaire de matematicas s'installèt en Occitània, a La Cepeda tre 1999, dins una bòria que renovèt.

Son activisme per la transparéncia budgetària comencèt del temps qu'èra en cò de sos parents a Tors e que decidiguèt per passar lo temps d'anar espepissar las deliberacions de la comuna. S'avisèt alara que dins los documents presentats i apareissián pas las indemnitats dels elegits. Gràcias als documents fornits en seguida, descobriguèt l'existéncia d'un fichièr que centraliza totas las deliberacions e los budgèts de las collectivitats. Decidiguèt puèi de luchar per lo far venir public e obtenir una transparéncia de las despensas dels elegits.

Creèt alara son associacion "Pour une démocratie directe" en 2008, e amb aquesta entamenèt tre 2011 una accion pr'amor d'obtenir d'informacion sus l'utilizacion de la resèrva parlamentària. Comencèt per o sollicitar al deputat de sa circonscripcion, lo socialista Jérôme Cahuzac que li faguèt pas cas. Se dirigiguèt puèi a la commission d’accès als documents administratius abans de pausar un recors davant lo tribunal administratiu.

Son combat per la transparéncia faguèt que venguèsse fichat pro lèu pels servicis policièrs del ministèri d'interior francés coma se n'avisèt en veire un policièr l'espiar, e aprèp que sa demanda de ficha foguèsse rebutada jol pretèxt qu'èra dins lo fichièr Seguretat de l'estat. Aprèp una segonda demanda de la CNIL aquel classament se vegèt anullat.

Fin finala, aguèt cèrt succès dins sa crosada que dos ans mai tard, lo 25 de junh 2013, recebèt los documents que lo tribunal administratiu aviá ordenat la publicacion de las donadas relativas a la resèrva per l'an 2011 (150 milions d'èuros au total) lo 23 d'abril del meteis an. Analisèt menimosament aquel milierat de paginas, amb l'ajuda de l'associacion Regard citoyens, e foguèt creada aprèp una representacion grafica de donadas estatisticas de las subvencions autrejadas qu'empleguèron puèi mantes mèdias.

L'accion se revelèt fructuosa qu'en julh de 2013, lo Senat adoptèt un amendament a la lei sus la transparéncia de la vida publica que impausa la publicacion annadièra de las subvencions autrejadas per cadun dels parlamentaris. A la debuta del mes d'agost de 2013, lo ministèri de l'interior publiquèt doas listas, per las annadas 2011 e 2012, de las subvencions acordadas a las collectivitats localas pels parlamentaris (deputats e senadors).

Parallèlament a aquesta lucha, Hervé Lebreton se sarrèt del mond de la politica tre 2012. Se presentèt aquel an a las eleccions legislativas dins la 3ena circonscripcion d'Òlt e Garona, e tornar en 2013. Pasmens sos resultats foguèron plan modèstes (respectivament 1,21% lo primièr còp e 1,69% l'an seguent) dins la circonscripcion de Jérôme Cahuzac.