Georges de la Tour

Georges de la Tour foguèt un pintre lorrenc, batejat lo 14 de març de 1593 dins lo vilatjòt de Vic-sur-Seille en Lorena, França, e mòrt lo 30 de genièr de 1652 a Lunéville, dins aquesta meteissa província.

Georges de la Tour
L'endevinaira, 1640
L'endevinaira, 1640
Nom de naissença	Georges Claude de la Tour
Naissença	14 de març de 1593 Vic-sur-Seille, Lorrena
Decès	30 de genoièr de 1652 Lunéville, Lorrena
Nacionalitat	Lorrenca, puèi francesa
Activitat(s)	Pintor
Mèstre	Caravaggio, Gerrit van Honthorst, Hendrick ter Brugghen
Movement artistic	Caravatgisme
Òbras reputadas	Lo Trichaire amb l'as de carrèu L'Endevinaira La Magdalena de la velhòla Sant Josèp carpentièr
Mecènas	Loís XIII
Illustracion : L'endevinaira, 1640

Aqueste artista visquèt al confluent de las culturas pinturalas flamenca, italiana e francesa, e foguèt un pintre contemporanèu d'autres grands pintres coma Jacques Callot e los fraires Nain. La granda particularitat de la pintura de la Tour es que lo pintre se concentra sus los aspèctes de la realitat quotidiana amb una intimitat indedita.

Son gost per los jòcs d'ombras e de lutz ne fa un dels seguidors màgers de Caravaggio.

Vida

Lo novèl-nat o Lo ninon, 1650.

Conegut de son vivent, Georges de la Tour foguèt doblidat aprèp sa mòrt e foguèt pas tornarmai descobèrt que dins las anadas 1920. Pasmens, sabem pas cap de segur sus son existéncia e son òbra.

Georges de la Tour foguèt batejat lo 14 de mars de l'an 1593 dins lo pichon vilatge lorrenc de Vic-sur-Seille, un vilatge qu'èra vengut francés de fach en 1552. L'acte de baptisme uèi conservat a Vic, indica que Georges es lo filh de « Jehan de la Tour boullenger » (boulanger en francés modèrne, es a dire un pancosièr o un fornièr) e de Sibylle Molian, que venlá tamben d'una familha de pancosièrs. Georges es lo segond d'una mainada de sèt.

Sa formacion a la pintura demòra desconeguda. Quand comencèt sa formacion per èsser pintre, deguèt benlèu encontrar de pintres òlandeses de l'escòla de Caravaggio a Utrecht coma Gerrit van Honthorst o Hendrick ter Brugghen. Aqueste viatge en Òlanda deguèt se debanar en l'an 1616.

Se diguèt que de la Tour auriá viatjat a Roma durant sa formacion, e qu'es ailà qu'auriá vist de pinturas de Caravaggio, del qual se seriá inspirat auriá aquesit aquel gost per los jòcs d'ombras e de lutz que fan uèi sa reputacion. Aquesta ipotèsi, sens que siá solide possible la refutar, es pas atestada per qualque pròva que siá. Tamben, d'unes pensan que de la Tour auriá conegut Caravaggio non directament mas per l'intermediari de seguidors sieus, e especialament Hendrick ter Brugghen. Çò que confòrta l'ipotèsi qu'es per los pintres flamencs e òlandeses que li venguèt lo caractèr plan caravatgenc de son òbra.

Se s'avera que de la Tour es pas jamai anat a Roma, es un dels sols pintres franceses de l'epòca que i a pas estudiat, tant Roma èra per los franceses lo centre artistic màger en Euròpa .

Se maridèt lo 2 de juilhet de 1617 amb Diane le Nerf, una dròlla de la noblesa de Lunéville, borgada del Ducat de Lorena.

Los nòvis s'installèron a Lunéville ont de la Tour comencèt la carrièra de pintre, jol regne d'Enric II de Lorena qu'èra un admirador de Caravaggio e qu'èra maridat amb la princessa italiana Marguerita de Gonzague (neboda de la Reina-Maire de França). D'aquel temps, de la Tour multiplicarà las òbras de tèmas religiós, mas tamben las scènas de genre (tèmas profanes), las scènas realistas que representan musicaires e mendicaires. En 1219, s'establiguèt a la cort del castèl de Lunéville e, en 1620, foguèt quitament recebut coma borgés de la ciutat, çò que li balhèt lo poder de recebre per autreg las franquesas per principi abitualament reservada a la noblesa. Venguèt lèu lèu un dels estatjants mai rics de Lunéville e recebèt fòrça comandas de totas parts, que siá de la borgesia o de la noblesa lorenas. Malgrat aquò, capitèt pas de se far reconéisser coma pintre oficial del duc de Lorena Enric II, aquel títol essent ja atribuïut al pintre Claude Deruet.

Òbra