MIDI

MIDI (siglas en anglés de Musical Instrument Digital Interface, interfàcia numerica d'instruments musicals) es un sistèma tecnic que balha la possibilitat de connectar d'instruments electronics amassa (o tanben d'instruments electronics e un ordinator) e d'escambiar d'informacion musicala entre eles. Los archius que contenon d'informacion MIDI an l'extension .mid e prenon pauc d'espaci virtual dins la memòria. Una ligason MIDI pòt trasméter fins a 16 canals d'informacion e cadun pòt èstre dreiçat a un instrument independent.

Exèmple de musica creada en format .mid

Lo sistèma MIDI permetís de jogar divèrses instruments amb sonque un còntrarotlaire (sovent un clavièr electronic, coma se vei aquí); sens l'existéncia d'aquel sistèma seriá besonh d'emplegar quatre clavièrs, mesclejatge exterior e una pedala d'effièches.

Los archius MIDI an d'informacion sus notason musicala, nautor (freqüéncia) de las nòtas, de senhals per còntrarotlar de paramètres coma volum, panoramica esterèa, vibrato, o per sincronizar lo tempo de divèrses instruments (sintetizators, sequençators, ordinators...). Aquela informacion es enviada amb de tralhas MIDI als aparelhs, qu'an de noseladors IN, OUT e THRU. L'informacion MIDI pòt èstre registrada sus un sequençator per la modificar puèi. Los archius MIDI an fòrça avantatges; per exèmple, son plan aisits de modificar e òm i pòt cambiar la causida d'instruments d'un biais mai rapid.

La tecnologia MIDI foguèt prepausada per los fondadors e presidents de qualques fachuriaires d'instruments electronics (Roland, Oberheim, Sequential Circuits) l'an 1981 e recebèt son estandard doas annadas puèi. Aicest estandard es mantengut per l'AMM (Association of MIDI Manufacturers, Associason de fachuriaires MIDI).