Luòctenent
Luòctenent es un reng militar que correspond a un reng d'oficier subaltèrn generalament situat entre lei rengs de sosluòctenent e de capitani. Dins la màger part dei fòrças armadas modèrnes, un luòctenent comanda una seccion o un peloton de 25 a 40 òmes.
Lo nom dau reng vèn de l'apelacion dei personas cargadas de tenir una posicion o un ròtle durant l'Edat Mejana en plaça dau titulari de la carga. Ansin, en França, existiá lo reng de « luòctenent generau dau Reiaume » que designava un individú cargat de remplaçar lo rèi dins certanei cas o per certanei missions en temps de guèrra o dins lei colonias. Lo reng modèrne apareguèt dins l'armada de Loís XIV quand foguèt creat un reng d'adjonch cargat de sostenir un capitani. Se difusèt pauc a pauc dins leis autreis armadas. Uei, es generalament lo premier reng ocupat per leis oficiers a la sortida de l'escòla militara. Dins certanei cas, pòu èsser egalament ocupat per de sosoficiers après lo passatge d'un examen.