Leon Castèl (en francés: Léon Castel; Lesinhan de las Corbièras, 7 de febrièr de 1871Lesinhan, 27 de febrièr de 1955) èra un politician occitan de Lengadòc que foguèt deputat d'Aude de 1919 a 1942.

Leon Castèl en 1932

Biografia modificar

Leon Castèl nasquèt a Lesinhan en 1871 dins una familha modèsta d'obrièrs agricòlas. Foguèt el tanben obrièr durant un quinzenat d'annadas abans de venir proprietari e viticultor. Pro rapidament se faguèt una plaça dins la vida sociala e politica de l'airal. En 1892, venguèt secretari del sindicat dels trabalhadors agricòlas de Lesinhan e tre 1895 faguèt lo correspondent de la Dépêche de Toulouse. Fondèt lo grop d'estudis socials de Lesinhan en 1896 e en 1898, foguèt elegit conselhièr d'arrondiment. Gardèt aquela carga fins a 1908 quand se presentèt per far de conselhièr general, posicion que deviá ocupar fins a 1939. En 1900, accediguèt a la comuna de Lesinhan que ne demorèt administrador fins a 1941, e, en 1910, capitèt de venir president de la federacion radicalasocialista d'Aude.

En 1919, fondèt a Lesinhan una cooperativa de vinificacion que serviguèt de modèl à mantas autras cooperativas occitanas. L'activitat que despleguèt en favor de la viticultura li valguèt d'èsser ennauçat a la presidéncia de la seccion locala de la Confederacion generala dels vinhairons, puèi de l'Ofici agricòla departamental, e finalament de participar al Conselh superior de l'agricultura.