Lengas minorizadas
Una lenga minorizada es una lenga practicada dins un territòri administrat per un Estat e qu'es pas la lenga oficiala principala de l'Estat. Una lenga minorizada pòt èsser non oficiala o ben pòt èsser una lenga oficiala segondària e regionalizada, mens reconeguda que la lenga oficiala principala de l'estat.
Las lengas minorizadas son de còps reconegudas e protegidas per l'administracion regionala o per l'Estat, mas de còps l'Estat reconeis pas que la lenga oficiala de l'Estat (es lo cas de las lengas minorizadas de França).
Demest los Estats europèus que reconeisson de lengas minorizadas, se pòt citar Belgica, lo Reialme Unit, Espanha e Alemanha (vejatz Carta Europèa de las Lengas Regionalas o Minoritàrias).
Una lenga minoritària es pas forçadament territorializada. Per exemple, la lenga aràbia en França es minoritària sens èstre identificada amb un territòri.
De lengas transfrontalièras son de còps reconegudas dels dos costats de la frontièra que separa los locutors.