Léontine Fay

Jeanne Louise Léontine Fay e mai tard Léontine Joly/Volnys (Tolosa, 9 de novembre de 1810 – Niça, 29 d'agost de 1876) foguèt una actritz de teatre francesa, plan famosa durant la primièra part del sègle XIX.

Léontine Fay a la primièra part del sègle XIX

Biografia

Léontine Fay nasquèt en 1810 a Tolosa dins una familha d'artistas. Son paire Étienne Fay èra compositor e actor e sa maire Jeanne Rousselois èra cantairitz. Aguèt una sòrre Élisa e Jean-Jacques Auguste qu'aviá per escais "Baron", que tanben faguèron de teatre.

En 1816, quand aviá pas que cinc ans jogava ja sus scèna al teatre a Francfòrt de Men en Alemanha, e mai tard, en 1821, dintrèt al Théâtre de Madame ont coneguèt una brava capitada. En 1832 se maridèt amb l'actor Charles Joly, que portava l'escais de Volnys. Un de sos succèsses mai importants foguèt dins l'òbra le Mariage de raison (1827). "La petita meravilha", escais que portava en aquel temps, foguèt citada dins mantuna òbra de l'epòca coma en çò de Balzac (dins son libre, Illusions perdues).

Plan apreciada pels russes, partiguèt tre 1834 qualque temps en Russia ont faguèt de lectritz a l'emperairitz abans de tornar a Niça. Moriguèt aprèp una crisi cardiaca lo 29 d'agost de 1876 a Niça.