L'egocentrisme (del latin ego, "ièu", e "centre") es una actitud psicologica que l'individú se considèra al centre de l'univèrs e dona valor a las causas per tant que li son d'utilitat pròpria; tanben, es incapable de se plaçar al luòc de l'autre per considerar la realitat dempuèi alà. Dins un sens mai larg, es egocentric aquel que considèra que son punt de vista e sos interèsses son pus importants qu'aqueles dels autres.

Psicologia modificar

Aquel concèpte foguèt utilizat pel psicològ soís Jean Piaget per senhalar l'incapacitat dels enfants de diferenciar lo seu pròpri punt de vista d'aquel dels autres. A la diferéncia del lengatge de comunicacion basat sus la dualitat question/responsa, sus la critica, sus la demanda, la menaça o sus totes los elements interaccionals, lo lengatge egocentric representa prèp dels tres quarts dins lo lengatge infantil pendent lo periòde d'edat comprés entre tres e sièis ans, acompanhat d'activitats solitàrias e de jòcs simbolics ont los mainatges fan de monològs o imitan las frasas realizadas per el meteis o pels autres.

Un altre aspècte de l'egocentrisme se vei amb la frequéncia elevada del mot "ièu" dins lo lengatge infantil, que se trapa mai dins las conversacions entre los mainatges que dins las conversacions entre los enfants e los adultes.

Lo lengatge egocentric se pòt trobar tanben dins la fasa adulta, quand òm se deu d'afrontar una situacion particularament dificila, o completament inesperada o dins de circonstàncias euforizantas.

Distincion modificar

L'egocentrisme se rapròcha de la megalomania e del narcissisme. L'egocentric s'ocupa en primièr de sa persona e pensa qu'es la premièra ocupacion dels autres. Al contrari de l'amor pròpri, l'egocentric s'ama pas coma es mas coma pareis èsser cap als autres, pensa qu'es l'unica causa del bonaür o del malur dels autres. L'egocentric se pòt veire coma salvador, tiran o martir d'aqueles que lo rodejan.

Atal l'egocentrisme diferís de l'egoïsme que paradoxalament, l'egocentric se preocupa fòrça dels autres (pasmens que los aime) perque s'estima segon la gaita e lo jutjament dels autres.

A l'opausat, l'allocentrisme es la tendéncia de far d'autrú lo centre de l'univèrs.