Chandragupta Maurya
Chandragupta Maurya (vèrs 340 - vèrs 291 avC) fuguèt lo fondator e lo premier sobeiran de l'Empèri Maurya de 322 a 298 avC. Fuguèt remplaçat per son fiu Bindusara après son abdicacion.
Seis originas son mau conegudas fins a la capitada d'un còp d'estat organizat amb son ministre Chanakya còntra lo rèi de Magadha. Après aqueu succès, installèt son poder dins la capitala Pataliputra e acomencèt una tièra de campanhas militaras per estendre son autoritat en direccion dau nòrd, dau nòrd-oèst de la peninsula indiana e dau sud. En particular, dins lo corrent d'aqueleis operacions, intrèt en conflicte ambé Seleuc Ièr Nicator, fondator de l'Empèri seleucida, per lo contraròtle deis ancianeis províncias orientalas de l'empèri d'Alexandre lo Grand. Après una guèrra lònga, capitèt d'obtenir la signatura d'un tractat avantatjós li donant la màger part dei territòris disputats en cambi d'elefants de guèrra. Lei dos estats concluguèron tanben una aliança que permetèt de securizar sa frontiera comuna. Chandragupta abdiquèt quauqueis annadas après aquela victòria e sariá vengut monge jaina.