Caront (luna)
Caront es lo satellit pus important de Pluton. D'un diamètre de 1 214 km, es un objècte fòrça freg que sa superficia es cubèrta de glaç de metan e d'azòt. Son estructura intèrna es mau coneguda mai es probable un còrs diferenciat amb un nuclèu rocassós enviroutat per una mescla de glaç e de ròca. I existís benlèu una activitat criovolcanica car la superficia de Caront es recenta (mens de 30 000 ans).
Caront a una massa que representa 12% d'aquela de Pluton e lo centre de massa d'aqueu sistèma a la particularitat de se trobar en fòra de l'objècte principau[1]. En causa d'aquela proprietat, lo pareu Pluton-Caront es de còps dich « planeta dobla ». La distància mejana entre lei dos còrs es de 19 130 km e Caront a un periòde de revolucion de 6,387 jorns segon un orbita sincròne ambé Pluton.
La descubèrta de Caront foguèt l'òbra de l'astronòm estatsunidenc James Walter Christy e aguèt luòc lo 22 de junh de 1978. De mesuras realizadas entre 1985 e 1990 permetèron d'establir una partida de sei caracteristicas coma sa massa e sa talha. Pasmens, en causa de la distància, leis informacions sus lo satellit demorèron limitadas fins au passatge de la sonda New Horizons dins lo sistèma de Pluton en julhet de 2015. Aquò permetèt de fotografiar Caront e d'observar sa superficia.
Liames intèrnes modificar
Bibliografia modificar
Nòtas e referéncias modificar
- ↑ Aquela particulara es pauc frequenta mai es pas rara. S'observa per mai d'un sistèma d'asteroïdes e mai per lo sistèma Soleu-Jupitèr.