Borís Nemtsòv
Borís Iefímovich Nemtsòv (en rus: Борис Ефимович Немцов; Sòchi, 9 d'octobre de 1959 – Moscòu, 27 de febrièr de 2015) foguèt un fisician e politician rus. Especialista de fisica quantica, de termodinamica e d'acostica, èra estat l'inventor d'un lasèr acostic e d'un disenhatge novèl d'antenas pels aparelhs espacials. Dintrat en politica durant l'epòca de Borís Ieltsin, que foguèt Ministre de l'Energia de son govèrn, èra dempuèi l'an 2000 un dels adversaris mai critics e ferotges de la politica de Vladímir Pótin.
Pr'amor d'aquesta dissidéncia, foguèt assassinat per carrièra a Moscòu lo 27 de febrièr de 2015, coma o foguèron anteriorament d'autres opausants a l'autoritarisme del president rus.
Biografia modificar
Borís Nemtsòv nasquèt en 1959 a Sòchi dins una familha de notables locals. Son paire, Iefim Nemtsòv èra un politician de l'endrech, membre del Partit Comunista de l'Union Sovietica qu'aviá ocupat qualques foncions dins los ministèris, mentre que sa maire, la pediatra Dina Nemtsòva (nascuda Eidman), èra de confession jusieva, pasmens l'enfant foguèt abalit dins la practica ortodòxa, batejat secretament aprèp sa naissença per sa grand pairala. Quand aviá pas que 10 ans, aprèp lo divòrci, se n'anèt amb la maire que s'installèt amb sos dos enfants, Borís e sa sòrre Iólia de 4 ans, dins la vila de Gòrki.
Escolarament se revelèt un escolan brilhant e aital a la fin de son escolaritat li foguèt autrejada una medalha d'aur.
Carrièra universitària modificar
De 1976 a 1981, estudièt las sciéncias fisicas a l'Universitat d'Estat de Gòrki, e mai tard, en 1985, i obtenguèt son doctorat en fisica dins los domenis dels plasmas e de l'idrodinamica, a l'edat de 25 ans. A partir de 1981 e durant 8 ans, fins a 1989, Nemtsòv trabalhèt coma cercaire borsièr a l'Institut de Recèrca en Radiofisica de Gòrki (en rus: Горьковский научно-исследовательский радиофизический институт, НИРФИ).
Carrièra politica modificar
Son implicacion dins l'esfèra politica comencèt en 1986, tot bèl just aprèp lo desastre de Chornobyl, quand organizèt de manifestacions dins sa vila pr'amor d'evitar la construccion d'una novèla centrala nucleara dins la region. Qualques ans mai tard, en 1989, Nemtsòv se presentèt amb una platafòrma reformista a las eleccions del Congrès dels Deputats del Pòble de l'Union Sovietica, de badas. Foguèt elegit per contra l'an seguent durant las eleccions del Soviet Suprèm coma representant de Gòrki. Arribat al Parlament s'associèt als grops politics reformistas e de centre-esquèrra.
Durant lo temps qu'èra dins lo comitat legislatiu a trabalhar sus de refòrmas agriculturalas e la liberalizacion del mercat exterior, foguèt remarcat per Borís Ieltsin.
Lo 13 de decembre de 2008, amassa amb Garry Kasparòv demest d'autres, fondèt lo partit Solidarnòst.
Son assassinat modificar
.JPG)
Per encausa de sa posicion plan critica amb la preséncia russa en Ucraïna dins l'encastre de la guèrra de Donbàs, Borís Nemtsòv, e mai sa maire, aviá paur d'èsser assassinat, coma o foguèron abans mantes opausants a Vladímir Pótin. Declarèt sa paur per sa seguretat dins una entrevista Lo 27 de febrièr de 2015, Nemtsòv e son amiga ucraïniana, Anna Dorítskaia, sortissián a l'entorn de 23h15 (ora locala) d'un restaurant dels grands magazins Gom, situats sus la Plaça Roja, e se dirigissián cap a l'apartament del menaire d'oposicion. Un quinzenat de minutas mai tard, a 23h31, del temps que passavan sul pont Bolshòi Moskvoretski a ras del Kremlin, un dels endreches mai segurs e susvelhats de Moscòu, un òme, probablament davalat d'un veïcul de neteja urbana, tirèt per darrièr 6 còps sus Nemtsòv. Lo politician foguèt alara abatut de 4 balas, una dins lo cap e las 3 autras dins l'esquina. Moriguèt sulpic qu'un dels projectils atenhèt son còr.
Malgrat la preséncia d'un nombre considerable de camèras, existís actualament pas qu'un enregistrament realizat dempuèi un endrech alunhat.