Batalha de Demyansk

La batalha de Demyansk se debanèt dins lo corrent de la Segonda Guèrra Mondiala entre lo 8 de febrier e lo 20 de mai de 1942. Opausèt lei fòrças sovieticas a l'armada alemanda. Aprofichant lei condicions ivernencas malaisadas e lei dificultats militaras alemandas après la batalha de Moscòu, lei Sovietics organizèron una ofensiva d'amplor dei 1a e 3a Armadas de tuert que capitèron d'enceuclar 7 divisions alemandas (aperaquí 100 000 òmes) dins una pòcha de 3 000 km² centrada sus la vila de Demiansk. Pasmens, lei temptativas sovieticas per destrurre leis unitats blocadas mau capitèron en causa d'una resisténcia acarnada e de l'instauracion d'un pònt aerian per la Luftwaffe permetent l'avitalhament dei defensors. A partir dau 21 de març, leis Alemands organizèron una tiera d'atacas que permetèron de durbir un corridor terrèstre e de desblocar lei tropas enceucladas (1èr de mai).

Fotografia d'un carri e de soudats alemands dins la pòcha de Demyansk en mai de 1942.

Lo bilanç uman dei combats foguèt relativament equilibrat amb aperaquí 20 000 soudats perduts per cada camp. Dins aquò, sa consequéncia pus importanta s'observèt a la fin de l'annada durant la batalha de Stalingrad. D'efèct, la capitada de la creacion d'un pònt aerian important per avitalhar la pòcha de Demyansk laissèt au sen de l'esperit d'Adolf Hitler l'idèa de poder tornar establir un pònt similar per lei tropas alemandas enceucladas a Stalingrad. Òr, coma aquelei fòrças èran fòrça pus importantas, aquò èra impossible e precipitèt la desfacha alemanda.

Liames intèrnes modificar

Bibliografia modificar

Nòtas e referéncias modificar