Còsta Pavada
Còsta Pavada es un quartièr residencial de Tolosa situat suls nauts de la vila, a l'èst d'aquela. Lo nom de Còsta Pavada es lo nom comun e tradicional de l'avenguda Jean Rieux.
La Còsta Pavada es lo nom del camin anant del pont del canal del Miègjorn, dit Pont Montaudran, e escaladant los travèrs. Se disiá per precisar : Còsta Pavada Montaudran. Aprèp l'establiment del Canal del Miègjorn en 1681, per regular las aigas davalant de la còsta, amenant de tèrra, suls Pòrts Sant Estève e Sant Salvador çò que damajava los cargaments de merças. Calguèt fixar lo sòl suls camins de Balmar, (carrièra del Pont Guilheméry, e l'avenguda Camille Pujol) e de Montaudran amb caladas. Aquelas installacions foguèron restauradas en 1766 e en 1783.
L'usatge corrent del nom se democratizèt amb la venguda dels transpòrts en comun. Lo 1èr genièr de 1885, una linha foguèt installada, amb de veïculs rotièrs de traccion ipomobila, ditz « Ripert », anant del Capitòli cap a la Còsta Pavada, pel mercat de blat. Lo 1èr de genièr de 1907, de ralhs son pausats, e lo servici es assegurat per de trams ipomobils. Lo 12 d'abril de 1910 es l'electrificacion. En 1921, la linha ven lo « 22 » (es encara a l'ora d'ara la Linha 22 del bus Tisséo : Marengo SNCF - Gonin, per l'avenguda Jean Rieux). En 1934, las vias son renovadas.
L'anonci del conductor del tram èra : « Tïn, tïn, Còsta Pavada. »
Del punt de vista de la geografia urbana, lo quartièr se constituís a l'entorn del palmon verd qu'es lo parc del collègi del Causon. L'abitat consistís subretot en ostals de vilas, las tolosanas. Los nauts del quartièr son ocupats per de grands ostals bastits entre las doas guèrras. Lo rèsta de las abitacions es format de pichons locatius e demoranças collectivas.