APORLÒC
L'Associacion Prefigurativa de l'Organisme de Regulacion de Lenga d'Òc (APORLÒC) es una entitat que foguèt ideada en 2008 a la Val d'Aran a partir d'una amassada ont i participavan associacions e regions occitanas. Son president actual, dempuèi lo 23 de març de 2011, es Gilabèrt Mercadièr.
L'APORLÒC s'es dissolguda per donar naissença al Congrès Permanent de la Lenga Occitana, lo 16 de decembre de 2011.
Objectiu modificar
L'APORLÒC es una entitat de transicion qu'a per tòca d'estudiar divèrsas entitats existentas per porgir al cap de dètz meses (de mai de 2010 a febrièr de 2011) un rapòrt per determinar l'estructuracion del futur organisme que deu gerir los afars lingüistics de l'occitan. Aqueste deu èsser una sintèsi d'observacions establidas a partir de visitas a divèrsas institucions coma l'Institut d'Estudis Catalans, de la Fryske Akademy e l'Euskaltzaindia e de conselhs a prepaus del futur organisme. Segon çò que se ditz dins la presentacion la futura "estructura qu'aurà de poder har recomandacions arron questions de neologia, de nòrma ortografica e gramaticau, de toponimia, en tot avisar-se'n de la collegialitat de las decisions e deu respècte de las variantas de l'occitan".
Istòria modificar
L'idèa d'un organisme d'aquesta mena, que foncionariá coma una acadèmia de la lenga, nasquèt a l'entorn de 2002 a partir dels problèmas qu'èran apareguts dins lo foncionar del Conselh de la Lenga Occitana (CLO). En 2003 l'IEO convidèt de membres del CLO e de divèrses organismes a Nimes per pensar a la creacion d'aquesta entitat pasmens l'encontre permetèt pas de far res de concret. De 2004 a 2006, lo president de l'IEO David Grosclaude, Sèrgi Carles (de la FELCO) e Patric Sauzet (del CLO) elaborèron un tèxt comun que fixava los grands principis d'un futur organisme de regulacion lingüistica.
L'APORLÒC se creèt en gropar mantun actor de la vida occitana: l'Institut d'Estudis Occitans, la FELCO, la Confederacion de Calandretas, la Chambra d'Òc, Lo Cirdòc, l'Institut Occitan e lo CROM pr'amor de bastir una "autoritat morala e scientifica independanta representativa dels locutors e dels usancièrs de la lenga d'òc" reconeguda pels poders publics dels tres estats ont s'i parla occitan. Se faguèt puèi una primièra amassada a Rodés lo 23 de julhet de 2008 que definiguèt lo foncionament de l'Associacion. En 2009 contunhèron las gestions per configurar l'entitat, l'inscriure a la prefectura e causir un encargat de mission. Aqueste, Benaset Dazeàs, foguèt causit finalament en abril de 2010.
Constitucion modificar
Lo Conselh d'Administracion es compausat d'un representant de l'Institut d'Estudis Aranesi, de l'Institut d'Estudis Occitans, de l'Associacion Internacionala d'Estudis Occitans, de l'InÒc, del Cirdòc, de la Chambra d'Òc, de la Confederacion Occitana d'Escòlas Laïcas Calandretas, de la Federacion dels Ensenhaires de Lenga e Cultura d'Òc, del Centre de Ressorsas Occitanas e Meridionau e d'un representant dels ensenhaires de la Val d'Aran.
L'encargat de mission es Benaset Dazeàs.
Rapòrt final e projècte modificar
En auton de 2011, l'APORLÒC difusèt un rapòrt final e anoncièt, en seguida d'aquel rapòrt, la creacion d'una autoritat de regulacion apelada «Congrès Permanent de la Lenga Occitana».
L'APORLÒC se dissolguèt lo 9 de decembre de 2011 per laissar plaça a la creacion del Congrès Permanent de la Lenga Occitana, que l'inaugurèron lo 16 de decembre de 2011 a Bordèu.
Criticas modificar
Lo 24 de novembre de 2011, certans lingüistas mandèron una letra dobèrta a l'APORLÒC per exprimir de preocupacions sus lo rapòrt final e lo projècte de «Congrès Permanent de la Lenga Occitana». Aqueles lingüistas presentan los arguments seguents:
- L'APORLÒC garentís pas la continuitat amb la nòrma classica de l'occitan, ja codificada per Loís Alibèrt (Gramatica occitana de 1935) e per lo Conselh de la Lenga Occitana (preconizacions sintetizadas en 2007).
- L'APORLÒC exclutz o relèga certans lingüistas; en particular, marginaliza pro de lingüistas del Conselh de la Lenga Occitana e del Grop de Lingüistica Occitana.
- Certans objectius de l'APORLÒC son irrealistas (diccionaris gròsses, listas exaustivas de toponims e de neologismes) perque preveson pas la metodologia ni las estapas tecnicas indispensablas per i arribar. Per exemple, i a pas de preocupacion per la lexicografia (metòde scientific per fabricar los diccionaris).
- Lo nom de «Congrès Permanent de la Lenga Occitana» es pesuc e manca de sobrietat.
| Precedit per | APORLÒC | Seguit per | ||
| Jèp de Montoya (genièr de 2009-març de 2011) |
|
- |
Ligams extèrnes modificar
- qualques articles del sit de l'APORLÒC, que existís pas mai, sus archive.today.
- Sit oficial del Congrès Permanent de la lenga occitana.
- Letra dobèrta: «De lingüistas professionals parlan a l'APORLÒC a prepaus del projècte de “Congrès Permanent de la Lenga Occitana”»