Rasés es un parçan d'Occitània[1] situat en Lengadòc.

Toponimia modificar

Son nom ven del nom antic de Rènnas del Castèl, Rhedae, Redae. Uèi, sa vila principala es Limós.
Las fòrmas ancianas son : Pagus Redensis en 788, Reddensis pagus en 791, In comitatu Ratensi en 870, Comitatus Redensis en 873, Pagus Radensis en 897, Comitatus Rendensis en 931, In comitatu Redense, in territorio Saltense en 1040, Civitas Reddensis en 1158, Vicarius Redensis en 1163, Terra Redesii en 1212, Reddesium en 1257, Radesium en 1260, Reddoys en 1333, In comitatu Redense, in suburbio Petrapertusensis en 1494, In Redesio archipresbyter en 1209, Archidiaconus Redensis en 1236, Officialis Reddesii Inferioris en 1257, Officialatus Reddesii et Limosi en 1304, Redditus Reddesii Inferioris et Superioris en 1307, Terra Redesii Superioris en 1320, Archidiaconat de Razès et de Sault entre 1266 e 1639 [2].

Istòria modificar

Rasés es un ancian pagus, desmembrat del comtat de Narbona e erigit en comtat al començament del sègle IX. Son espandiment èra vast al començament e confrontava a l'èst le comtat de Narbona, al sud, Rosselhon, Conflent e Cerdanha, a l'oèst, le comtat de Tolosa, al nòrd, le comtat de Carcassona. Compreniá donc le Rasés pròpriament dit, Fenolhedés, le País de Saut, Donasan, Capcir e la castelaniá de Pèirapertusés. Rasés agèt d'en primièr de comtes particulars, puèi passèt al poder dels comtes de Carcassona. Foguèt unit al domeni reial après le tractat de 1258 entre Sant Loís e Jacme Ièr d'Aragon, fasiá pas partida del domeni util de la Corona e gardèt de senhors a Limós, Coisan, Arcas, dins la Tèrra Privilegiada, le País de Saut, Donasan; l'arquevesque de Narbona, las abadiás d'Alet, de Sant Policarpi, de Sant Martin de Les, de Jocon, de Cubièra, de Sant Ponç, pus tard l'avesque e le capítol d'Alet e la collegiala de Sant Pau de Fenolhet. A costat de las justícias senhoralas, le rei aviá un viguièr a Limós e un baile al País de Saut, que ressortissiá de la senescalciá de Carcassona, puèi après de la de Limós[2].
Le Rasés pròpriament dit foguèt despartit en Naut Rasés, al sud, e Bas Rasés al nòrd. En 1318, le Naut Rasés foguèt incorporat a la diocèsi d'Alet, ont formava a l'espiritual l'archipreirat de Sant Andrieu d'Alet; le Bas Rasés foguèt mantengut dins la diocèsi de Narbona, ont formava l'archipreirat de Rasés (caplòc Ajac; le Bas Rasés, pel temporal, foguèt unit a la diocèsi civila d'Alet, abans de formar una diocèsi civila particulara[2].
Rasés se situa dins lo departament francés d'Aude. Ara, la consciéncia d'aquel territòri se limita mai que mai al canton d'Alanha e a qualques comunas prèp de Limós.

Vejatz tanben modificar

Ligams extèrnes modificar


Nòtas modificar

  1. Segon la classificacion de Frederic Zégierman.
  2. 2,0 2,1 et 2,2 Abbé Sabarthès, Dictionnaire topographique du département de l'Aude, 1912, p. 342, legir en linha https://gallica.bnf.fr/ark:/12148/bpt6k110095d/f434.item.texteImage