Paolo Uccello

Paolo di Dono di Paolo, dich Paolo Uccello (Florença, 1397 – Florença, 1475), es un pintre italian de la primièra Renaissença, filh de Dono di Paolo, cirurgian e barbièr, e d'Antonia di Giovanni del Beccuto.

Retrait d'Uccello per un anonim del sègle XVI.

Biografia

Paolo Uccello foguèt un pintre del Quattrocento (sègle XV) que marquèt l'istòria de la pintura per son mestritge de las novèlas règlas de la Perspectiva. Foguèt d'en primièr aprendís en çò de Lorenzo Ghiberti entre 1407 e 1414 environ, ailà faguèt coneissença amb de pintres coma Masolino, Donatello e Michelozzo. Participèt a l'epòca a las finicions de la pòrta del batistèri de Florença. Aprèp aver recebut las formacions de pintre, escultor, orfèbre e arquitècte, rejonhèt en 1424 la Companhiá dels pintres de San Luca e foguèt apelat un an pus tard per tornar far las mosaïcas de la basilica de San Marco (Venècia) destruidas per un encendi. En 1432 trabalhèt a la realizacion de la copòla de la glèisa de Santa Maria del Fiore. Recebèt sa primièra comanda monumentala en 1436 e realizèt la fresca lo Monument equèstre, dedicat al condottiere anglés John Hawkwood. Tota sa vida, faguèt de sas recèrcas sus la perspectiva una vertadièra passion anant de vegadas cap a l'obsession, rason per la quala lo critiquèron sos contemporanèus e l'escaissèron, Uccello («aucèl» en italian), segurament per causa de sos capricis e sa distraccion. Pr'aquò aquela istòria seriá una legenda, auriá apertengut a una anciana familha florentina exiliada a Bolonha, los Ucceli.

Segon Le Vite de Giorgio Vasari, Paolo Uccello acabèt sa vida en 1475 « solet, excentric, malencòni e paure ».

Qualques òbras

• 
  Sant Jòrdi esternissent lo dragon, 1439-1440 (París, Musèu Jacquemart-André).
• 
  Sant Jòrdi esternissent lo dragon, 1450-1455 (Londres, National Gallery).
• 
  Lapidacion de sant Estève.
• 
  Lo Deluvi.

Principalas

La Batalha de San Romano : un dels tres panèls dispersats dins lo monde
La contraataca de Micheletto da Cotignola (1455), Musèu del Lovre, París

• Sant Jòrdi e lo dragon (entre 1439 e 1440, destrempa sus fusta, 52 cm × 90 cm, National Gallery, Londres, Anglatèrra)
• Lo Deluvi (1446-1448, Chiostro Verde de la Santa Maria Novella, Florença) : aquela pintura murala es una experiéncia de Paolo Uccello sus la representacion ont cerquèt los limits de la perspectiva en l'accentuant al maximum.
• La Batalha de San Romano (destrempa sus pibol, 182 cm × 320 cm)
  Aquela òbra en tres panèls independents executada entre 1456 e 1460 es una de las pus conegudas de Paolo Uccello. Comandada pels Medicis, representa una scèna de l'istòria de Florença datant de 1432. Los tres episòdis son repartits dins tres païses :
  • en Itàlia al Palais dels Oficis de Florença,
  • en Anglatèrra a la National Gallery de Londres
  • en França al Musèu del Lovre de París.

• La Tebaïda (o Scene della vita di santi e di alcuni monaci) - Galleria dell'Accademia de Florença - pintada entre 1450 et 1475, es una larga fresca representant la vida de sants dins lor activitat monacala.

Lista cronologica

• Renonciacion (env. 1420–1425) - Ashmolean Museum, Oxford
• La Creacion e la Casuda (env. 1424–1425) - Chiostro Verde, glèisa de Santa Maria Novella, Florença
• Adoracion dels magues (env. 1431–1432) - Staatliche Kunsthalle, Karlsruhe
• Sant Jòrdi e lo dragon (env. 1431) - National Gallery of Victoria, Melbourne
• Poliptic (env. 1433) - Museo Arcivescovile di Castello, Florença
• Frescas de la capèla dell' Assunta (env. 1434–1435) - Duomo, Prato
• Monjas amb dos enfants (env. 1434–1435) - Colleccion Contini-Bonacosi, Florença
• Monument equèstre de Sir John Hawkwood (Giovanni Acuto) (env. 1436), fresca - Duomo, Florença
• La Batalha de San Romano, tres panèls dispersats entre la National Gallery, lo Musèu del Lovre e los Oficis
• Sant Jòrdi e lo dragon (env. 1439–1440) - Musèu Jacquemart-André, París
• Panèl del relòtge amb profètas e evangelistas (1443) - Duomo, Florença
• Resurreccion (1443-1444) - veirièra, Duomo, Florença
• Nativitat (1443-1444) – veirièra, Duomo, Florença
• Istòria de Noè (env. 1447) - Chiostro Verde, Santa Maria Novella, Florença
• Scènas de la vida monastica (env. 1447–1454) - San Miniato al Monte, Florença
• Sant Jòrdi e lo dragon (env. 1450-55) - National Gallery, Londres
• Crucifixion (env. 1457–1458) - Thyssen-Bornemisza Collection, Madrid
• Vidas dels sants paires (env. 1460–1465) - Galleria dell'Accademia de Florença
• Miracle de la profanacion de l'ostia (1467–1468) - predèla, Galleria Nazionale delle Marche, palais ducal, Urbin)
• Caça dins la forèst (env. 1470) - Ashmolean Museum, Oxford

Bibliografia

• (fr) James Bloedé, Paolo Uccello et la représentation du mouvement : regards sur La Bataille de San Romano, Paris, École nationale supérieure des beaux-arts, " Espaces de l'art ", réédition 2006. ISBN 2840560399

• (fr) Jean-Louis Schefer, Le déluge, Paolo Uccello, Paris, POL, 1999. ISBN 2867446767

• (fr) vidèo : Vacarmes en Toscane, Paolo Uccello d'Alain Jaubert, collection Palettes. Considérations sur le peintre, en particulier sur la Bataille de San Romano