Jaro Prohaska
Jaro Prohaska (1891–1965) es un baritòn-bassa austriac conegut mai que mai per de ròtles wagnerians.
Biografia modificar
Jaro Prohaska o Jaroslav Prohaska (son nom oficial ?) nasquèt a Viena (Austria) lo 24 de genièr de 1891 e moriguèt a Munic lo 28 de setembre de 1965[1].
Entre 1898 e 1906, Prohaska èra solista alto dins lo còr D. Peterlinis (Còr de drolles de Viena). Estudièt la musica ambe Otto Müller e en 1907 venguèt organista, puèi en 1909 Regens chori a Senta Tecla. Après que foguèt prisonièr de guèrra (1915-18), venguèt cap de còr a Viena e estudièt lo cant. Jaro Prohaska foguèt engatjat en 1922-25 a Lübeck, en 1925-31 a Nurembèrg (segon Riemann a Praga tanben), puèi en 1931-52 a l'Opèra d'Estat de Berlin. De 1952 a 1959, venguèt director de l'escòla d'opèra de Berlin. Faguèt d'aparicions nombrosas al Festenal de Bayreuth entre 1933 e 1944 e a l'Opèra nacional de Viena entre 1934 e 1937 [2].
Son fraire cabdèt Paul Georg, violoncellista, nasquèt lo 9 d'abrial de 1903 a Viena e moriguèt lo 2 de junh de 1989 a Graz[2].
Importància musicala modificar
Jaro Prohaska agèt l'onor de cantar ambe'ls pus grands pendent l'edat d'aur del cant wagnerian, sense èsser completament de lor nivèl, pr'amor d'una votz que mancava d'omogeneïtat, en tot cas a l'epòca dels enregistraments, ont aviá la cinquantena.
Es documentat dins de ròtles de baritòn, Kurwenal (Tristan e Isòlda), Friedrich von Telramund (Lohengrin) e de baritòn-bassa, Hans Sachs (Los Mèstres cantaires de Nurembèrg), l'Olandés (L'Olandés volant), etc.