Exposicion universala de 1876

L'Exposicion universala de 1876 (oficialament en anglés: Centennial Exhibition of Arts, Manufactures and Products of the soil and mine o Centennial International Exhibition (valent a dire "Exposicion internacionala del Centenari") foguèt la primièra Exposicion universala que se debanèt als Estats Units del 10 de mai al 10 de novembre de 1876. Se faguèt a Filadelfia del temps que se commemorava lo centenari de la Declaracion d'independéncia dels Estats-Units d'America qu'èra estada signada dins aquesta vila lo 4 de julh de 1776. Lo nom complet de l'exposicion èra en realitat International Exhibition of Arts, Manufactures and Products of the Soil and Mine, qu'en occitan es "Exposicion internacionala d'art, de confeccion, e de produches del sòl e de la mina". Aquel eveniment s'organizèt dins lo Parc Fairmount, long del riu Schuylkill e s'espandissiá sus un total de 34 ectaras.

Memorial Hall

L'exposicion foguèt una brava capitada vist que foguèt visitada per 9.789.392 personas, çò que equivaliá en aquel temps a 20% de la populacion dels Estats Units. Son còst se sarrèt de 7 milions de dolars.

Durant aquela escasença se presentèt per primièr còp la tòrcha de l'Estatua de la Libertat al public.

Grelh del projècte

L'idèa de far l'Exposicion Universala sembla d'èsser deguda a John L. Campbell, un professor de matematicas, de filosofia naturala e d'astronomia del Wabash College, Crawfordsville, Indiana. En decembre de 1866, Campbell suggeriguèt al cònsol de Filadelfia que lo Centenari dels Estats Units siá celebrat amb una exposicion a Filadelfia.

Estructuras de l'exposicion

Bastiment Principal de l'Exposicion universala, Filadelfia (1875-76, que foguèt desassemblat e vendut en 1881). Èra en aquel temps lo bastiment mai grand del mond entièr.

Se bastiguèron mai de 200 bastiments sul terrenh de l'Exposicion, que èran envirats d'una barranha que fasiá gaireben cinc quilomètres de long. La comission de l'exposicion aviá organizat un concors de creacion arquitecturala pels bastiments mai importants, que foguèt realizat en dos còps. Los qu'avián capitat de passar la primièra part devián donar divèrses detalhs coma lo còst o lo temps de construction abans lo 20 de setembre de 1873.