L'estruci (Struthio camelus) es l'aucèl vivent mai grand. Fa fins a 2,5 mètres d'auçada, pòt pas volar e segon fòrça autors, es lo darrièr membre vivent de la familha dels estrutionids e de son genre, Struthio.

Estrucis d'Africa mascle e femèla.
Nis d'estruci.
Uòu d'estruci.

D'autres membres dels estrutioniformes son los reas, los emús, los casuaris, los kiwis e l'aucèl mai grand qu'aja jamai existit, l'Aepyornis, uèi desaparegut. Los estrucis an lo còl a las cambas fòrça longs e pòdon corrir fins a 65 km/h.

Los estrucis se tròban, de biais natural, dins las savanas e los semidesèrts d'Africa, tant al nòrd coma al sud de la zòna tropicala boscosa.

Sas plumas li servisson pas per volar, mas son fòrt presats coma ornaments per los capèls de las damas, e mai. Los estrucis son plan grands perque un pichon uman los pòt cavalgar e s'utilizèron en certans luòcs del nòrd d'Africa e Aràbia coma animals de corsas.

Es abalit per sa carn dins fòrça païses, inclús en climas freds coma aquel de Finlàndia. Lo gost de la carn d'estruci sembla lo del vedèl.

Segon la mitologia populara, l'estruci es famós per enterrar lo cap dins la sabla al primièr senhal de perilh. En realitat, s'obsèrva pas aquel comportament.

Los estrucis nisan comunautàriament. Un cèrt nombre de femèlas pondon los uòus dins lo meteis niu, ont son coats per la femèla en principal, pendent lo jorn, e pel mascle, pendent la nuèch. Los uòus d'estruci son los pus gròsses d'entre totes los uòus.

Sosespècias modificar

Los estrucis se dividisson en cinc sosespècias, que son:

  • S. c. australis, de Sud-Africa, nomenat estruci meridional. Se tròba al sud dels rius Zambèzi e Cunene e dins la plana subdesertica de Karoo, Província del Cap.
  • S. c. camelus, de l'Africa del Nòrd, nomenat estruci d'Africa del Nòrd o estruci del còl roge. Es la sosespècia pus estenduda, e espandisson dempuèi Etiopia e Sodan, a l'èst, a Senegal e Mauritània, a l'oèst, e abans en Egipte e Marròc. Es la sosespècia mai granda; mesura fins a 2,74 mètres e 154 quilogramas. Lo còl presenta una color rogenca e lo plumatge vària segon lo sèxe; los mascles l'an blanc e negre, e las femèlas gris.
  • S. c. massaicus, d'Africa Orientala, nomenat estruci massai. An qualques plumas pichonas sul cap e son còl e sas cuèissas son de color irange brilhanta. Pendent l'epòca d'apariament, lo còl e las cuèissas del mascle venon brilhants. Son territòri se limita al sud de Kenya, l'èst de Tanzania e Etiopia e de zonas meridionalas de Somalia.
  • S. c. syriacus, d'Orient Mejan, nomenat estruci arabi o estruci d'Orient Mejan. Foguèt una sosespècia fòrça comuna dins la Peninsula Aràbia, Siria e Iraq, mas despareguda en 1966.
  • S. c. molybdophanes, d'Etiopia meridionala, nòrd-èst de Kenya e Somalia, nomenat estruci somali. Lo còl e las cuèissas son d'un color entre gris e blau, e pendent l'epòca d'apariament, lo còl e las cuèissas del mascle venon blau brilhant. Las femèlas son pus marrons que las femèlas de las autras sosespècias. Generalament vivon sols o en coble. Son territòri es lo meteis del S. c. massaicus al nòrd-èst de Kenya.

Las analisis indican que l'estruci somali se poiriá considerar coma una espècia independenta (Struthio molybdophanes). Lo projècte "The Tree of Life" e "Avibase" lo reconeisson coma una espècia diferenta de l'estruci, mas la "IOC" e "Birdlife" tanpauc lo reconeisson coma espècia. Dempuèi 2008, Birdlife.com revisa la division prepausada.

Ligams extèrnes modificar