Elsa
Elsa Lunghini, o mai simplament Elsa, es una cantaira e actritz francesa nascuda lo 20 de mai de 1973 a París (França).
Biografia modificar
Elsa Lunghini es la filha de Georges Lunghini e de Christiane Jobert, sòrre de l'actritz francesa Marlène Jobert (çò que fa que n'es la neboda).
A sèt ans, Elsa interprèta en 1981 son primièr ròtle al cinèma dins lo film Garde-à-vue de Claude Miller, còsta Romy Schneider, Lino Ventura e Michel Serrault.
En 1986, jòga dins mantuns filmes en particular dins La Femme de ma vie (ambe Christophe Malavoy, Jean-Louis Trintignant e Jane Birkin). Es a l'escasença d'aqueste filme que s'ensaja a la cançon en i cantant lo tèma màger, lo títol T'en va pas. Aquel ensag es coronat de succès vist que li permet d'èsser, a l'edat de tretze ans, la mai jove artista d'èsser no 1 del Top 50 en França al debut de l'annada de 1987, lo 45 torns se vend quitament a 1 300 000 exemplars.
En 1988, sortís son primièr album, Elsa, qu'encontra una granda capitada (mai de 800 000 albums venduts), ambe en particular los tubes Quelque chose dans mon cœur (sortit fin 1987), Un roman d'amitié (un còp de mai n°1 pendent l'estiu de 1988, en duò ambe Glenn Medeiros), Jour de neige, À la même heure dans deux ans e Jamais nous (en duò ambe Laurent Voulzy, sus un tèxte de Didier Barbelivien).
En 1990, Elsa sortís son segond album, Rien que pour ça, d'ont ne son tirats los títols Rien que pour ça, Pleure doucement e Qu'est-ce que ça peut lui faire ?, qu'an tostemps de resson dins los païses francofòns.[1]
Enfin, en 1992, lo single Bouscule-moi tirat de son tresen album, Douce Violence, es son darrièr vertadièr succès.
Cançons mai conegudas modificar
- T'en va pas (1986)
- Quelque chose dans mon cœur (1987)
- Un roman d'amitié (friend you give me a reason) (1988, ambe Glenn Medeiros)
- Jour de neige (1988)
- À la même heure dans deux ans (1989)
- Jamais nous (1989, ambe Laurent Voulzy)
- Rien que pour ça (1990)
- Pleure doucement (1991)
- Qu'est-ce que ça peut lui faire ? (1991)
- Bouscule-moi (1992)