Charles Lyell
Charles Lyell (14 de novembre de 1797 - 22 de febrier de 1875) es un geològ escocés dau sègle XIX, famós per aver popularizat lo principi de l'uniformitarisme.
Nasquèt a Kinnordy dins una familha de dètz enfants. Botanista, son paire lo dirigiguèt vèrs l'estudi de la natura au collègi d'Exeter puei a l'Universitat d'Oxford. Charles Lyell foguèt ansin diplomat en geologia en 1816. Adoptèt leis idèas de James Hutton sus l'origina plutonica dei ròcas e viatjèt en França e en Itàlia. Aquò li permetèt de descubrir qu'èra possible d'identificar lei jaç geologics contenent de fossils en foncion dei fossils presents. Imaginèt ansin la premiera escala dei temps geologics. Pus important, capitèt de liar lei teorias de James Hutton amb lei principis de l'estratificacion, çò que foguèt una etapa importanta dins l'istòria de la geologia.
A partir de 1830, comencèt de publicar sei Principis de geologia que demorèron la referéncia de la disciplina fins a sa mòrt. En particular, i presentèt lo principi de l'uniformitarisme que postula que la Tèrra seriá estada lentament faiçonada per de procès que contunian a l'ora d'ara. Lèi de basa de la geologia modèrna, aquela idèa foguèt largament acceptada gràcias au trabalh de Lyell.
Charles Lyell recebèt la Royal Medal en 1834, la medalha Copley en 1858 e la medalha Wollaston en 1866. Venguèt sòci de la Royal Society en 1826 e foguèt anoblida en 1848. Enfin, foguèt lo president la Geological Society of London en 1835-1836 e en 1849-1850.
Liames intèrnes modificar
- Catastrofisme, principi opausat a l'uniformitarisme.
- Geologia.
- James Hutton.