Acier de Damasc
L’acier de Damasc (var. acièr de Damasc) es lo nom donat a dos tipes d'aciers aguent una aparéncia moerada. Es utilizat per la produccion de lamas de prestigi.
Istoricament, l'acier de Damasc es un acier, tanben dich « wootz », aparegut en Índia durant lo sègle IV avC. Reputat per sa qualitat, per son aspècte e per sei motius moerats, èra produch a partir de mineraus de fèrre de qualitat marrida, çò que necessitava un tractament particular e lòng. En causa de sa raretat relativa, èra destinat a la produccion d'armas de qualitat. Lei tecnicas de fabricacion èra generalament gardadas secrètas per lei fabres. Pasmens, se difusèron en Orient Mejan onte lei lamas de Damasc impressionèron fòrça lei crosats[1]. L'acier de Damasc istoric dispareguèt durant lo sègle XVII, probablament en causa de l'agotament dei mineraus de wootz, e lo saber-faire necessari a son elaboracion es perdut.
L'acier de Damasc actuau, ò « acier de Damasc de corrolhatge », es lo resultat de recèrcas menadas en França e en Suècia a partir dau sègle XVIII per tornar descubrir l'acier de Damasc istoric. Retrai visualament au wootz, mai sei proprietats son diferentas. Per l'obtenir, fau soudar e martelejar de bendas d'acier ò de fèrre aguent de concentracions diferentas de carbòni. D'efiech, aquò permet de fabricar d'acier fòrça resistents que foguèron emplegats per la fabricacion de fusius fins au sègle XX. Uei, aqueu procès demòra utilizat per produrre de lamas ò d'armas de prestigi. Lo procès japonés dau mokume-gane es una tecnica artesanala relativament similara.
Liames intèrnes modificar
Bibliografia modificar
- (fr) Jean-Luc Soubeyras, Manuel de fabrication du damas, Fontaine, EP, 2008.
Nòtas e referéncias modificar
- ↑ Pasmens, fau nuançar lei qualitats atribuïdas ai lamas de Damasc per lei crosats. Premier, èran d'armas de qualitat, çò qu'explica sei performàncias. De mai, aquelei legendas èran largament eissidas de mites destinats a valorar l'enemic per aumentar lo sieu coratge. Ansin, dins lo camp araboturc, de racòntes similars ai legendas estacadas a l'acier de Damasc apareguèron sus leis espasas d'acier lusent utilizadas per lei crosats.