Acid acetic
L’acid acetic ò acid etanoïc es un acid carboxilic de formula bruta C2H4O2 e de formula semidesvolopada CH3–CO–OH. Es un acid feble, de pKa egau a 4,76, qu'es lo constituent principau dau vinagre après l'aiga. Obtengut tre l'Antiquitat gràcias a de procès de destillacion dau vinagre, es lo premier acid industriau conegut. A l'estat pur, es una substància inflamabla e fòrça corrosiva per lei teissuts biologics. A d'aplicacions nombrosas coma solvent, coma matèria premiera per fabricar d'autrei substàncias, coma additiu alimentar ò coma agent desinfectant. Es ansin un dei produchs pus fabricats e pus utilizats per l'industria quimica modèrna.
Nomenclatura modificar
Lo nom normalizat de l'acid acetic, segon lei règlas de l'IUPAC, es « acid etanoïc ». Pasmens, s'es pas inexistent dins la literatura scientifica e tecnica, aqueu tèrme es mens utilizat que lo nom triviau. Aquò es frequent per la màger part dei substàncias qu'èran ja conegudas avans l'aparicion de la quimia modèrna. Lo tèrme « acetic » vèn dau latin acetum que designava lo vinagre. En Occitània, es tanben possible de trobar « acid etilic » qu'es probablament eissit dau francés acide éthylique. L'apelacion « acid acetic glaciau » designa de solucions puras – fòrça corrosivas – d'acid acetic.